Manuel García Matos

Nesta página se gasta una ortografía destinta ala que normalmenti se gasta ena Güiquipedia.

Manuel García Matos ( * Prasencia 1912 - † Madril 1974) jue un famosu folclorista y miembru el Instituto Español de Musicología. Jiðu estuyus de violín, frauta, pianu, armonía y contrapuntu. Con 18 añus junda los Coros Extremeños y esmienza a labutal pola recopilación literariu-musical de cantaris, centrándussi nel estuyu d'istrumentus y danzas. Primeru jaði esti trebaju en Estremaúra, pa más tardi acontinalla pa otrus lugaris, llegandu a arrejuntal más de 10 000 documentus musicalis.

Nel añu 1945 se le atorga el premiu Nacional de Folclori y llega a sel catedráticu d'esta materia nel Real Conservatorio de Música de Madrid.

Pubricó un cancioneru la Arta Extremadura y otru la provincia Mairil, assina cumu el trebaju incompretu "Danzas Populares de España", con música y coreografía, de la que namás que se pubrican los tomus al tentu Estremaúra, Andaluðía y Castilla la Nueva. Cona tutela la UNESCO, elaboró la "Magna Antología del Folclore Musical de España".

Tuvu un intrés particulal pol flamencu, amás de sel un apassionáu la música pa frauta tres buracus y tamboril. Se le pue escuchal tocal essi istrumentu enas grabacionis d'Alan Lomax pa Estremaúra (los pindongus y el quita y pon de Montirmosu y unas melodías pa danzas de paléus), l´únicu documentu que tenemus d'él tocandu música.